ކުޅުދުއްފުށީ ރީޖަނަލް ހޮސްޕިޓަލުން އެއް ހަފްތާކުރިން އެޕޮއިންޓްމަންޓް ހައްދައިދެނީ

ހދ.ކުޅުދުއްފުށީ ރީޖަނަލް ހޮސްޕިޓަލުން އެޕޮއިންޓްމެންޓް ހައްދައިދޭ މުއްދަތަށާއި ގަޑިއަށް ބަދަލުގެންނަން ނިންމައިފިއެވެ.

މި ޖެނުއަރީ މަހުގެ 29 ވާ އާދިއްތަ ދުވަހުން ފެށިގެން އެހޮސްޕިޓަލްގެ ޑޮކްޓަރުންނަށް ދެއްކުމަށް އެއްހަފްތާކުރިން އެޕޮއިންޓްމެންޓް ހައްދައިދިނުމަށްވަނީ ހަމަޖެހިފައެވެ. އެޕޮއިންޓްމަންޓް ހައްދައިދޭ ވަގުތެއްގެ ގޮތުގައި ހަމަޖައްސާފައިވަނީ ކޮންމެ ދުވަހެއްގެ މެންދުރުފަހު 2:00 ން ހަވީރު 6:00 ށެވެ. މިހާރު އެޕޮއިންޓްމަންޓް ހައްދައިދެނީ އެއްދުވަސް ކުރިން މެންދުރު 12:00 ން ފެށިގެން އެޕޮއިންޓްމަންޓް ފުލްވަންދެންނެވެ.

އެ ހޮސްޕިޓަލްގެ މެނޭޖަރ އަލްފާޟިލާ ޝީޒާ އިބްރާޙީމް ކޭ.އެލްއަށް މަޢުލޫމާތު ދެއްވިގޮތުގައި މި ބަދަލުގެނައުމުގެ މަޤްޞަދަކީ ކިޔޫ ކުޑަކުރުމާއި ހުރިހާ ފަރާތްތަކަށް ހަމަހަމަ އުސޫލެއްގެމަތިން ޑޮކްޓަރަށް ދެއްކުމުގެ ފުރުޞަތު ފުޅާކުރުން ކަމަށެވެ.

އެޕޮއިންޓްމެންޓް ހެއްދުމަށާއި އިތުރު މަޢުލޫމާތު ސާފުކޮށްދިނުމަށް 6528864 ނަމްބަރ ފޯން އެކަނި ބޭނުންކުރަމުން އައިސް، ޚިދުމަތް ހޯދާ ފަރާތްތަކަށް ފަސޭހަ ކުރުމުގެ ގޮތުން މިދިއަ އަހަރުގެ ޖޫން މަހުގެ 29 ވަނަ ދުވަހުވަނީ އިތުރު އެމަޖެންސީ ފޯން ނަންބަރެއްގެ ގޮތުގައި ވަތަނިއްޔާގެ 9808864 ނަމްބަރ ތަޢާރަފްކޮށްފައެވެ.