ވައިކަރަދޫއިން ދަނޑުބިން ކުއްޔަށް ދޫކުރަނީ

ވިޔަފާރި އުސޫލުން ބިންކުއްޔަށް ހިފައިގެން ހދ.ވައިކަރަދޫގައި ދަނޑުވެރިކަން ކުރަން ބޭނުންވާ ފަރާތްތަކަށް އެ ރަށު ކައުންސިލުން އެފުރުޞަތު ހުޅުވާލައިފިއެވެ.

ކޭ.އެލްއަށް މަޢުލޫމާތު ދެއްވަމުން ވައިކަރަދޫ ކައުންސިލްގެ ނައިބްރައީސް އަލްފާޟިލް އަބްދުﷲ ޝަރީފް ވިދާޅުވީ ދަނޑުވެރިކަން ކުރުމަށް ދޫކުރުމަށް އެއްފަރާތަކަށް އެންމެ ބޮޑުކޮށް ދޫކުރެވޭނީ  20000 (ވިހި ހާސް) އަކަފޫޓެވެ. އަދި އެންމެ ކުޑަ ކުއްޔަކަށް ހުށަހެޅޭނީ އަކަފޫޓަކަށް 3 ލާރިއެވެ. ބިޑް އުސޫލުން ދޫކުރުމަށް ހަމަޖައްސާފައިވާ އެ ބިންތައް ދޫކުރުމަށް ނިންމާފައިވަނީ އެންމެ ރަނގަޅު ހުށައެޅުމެއް ހުށައަޅާ ފަރާތްތަކަށްކަމަށް އޭނާ ވިދާޅުވިއެވެ.

ދަނޑުވެރިކަން ކުރުމަށް ވިޔަފާރި އުސޫލުން ބިން ކުއްޔަށް ހިފުމަށް ޝައުގުވެރިވާ ފަރާތްތަކުން އެކަމަށް އެދި ފޯމް ހުށައެޅުމުގެ އެންމެ ފަހު ތާރީޚަކީ 12 ފެބްރުއަރީ ވާ އާދީއްތަ ދުވަހުގެ މެންދުރު ފަހު 02:00 އެވެ. ވައިކަރަދޫ ކައުންސިލުން ވިއްކަމުންދާ މި ފޯމް ވައިކަރަދޫ އަމިއްލަ ފަރުދުންނަށް ވިއްކަނީ -/50 ރުފިޔާއަށެވެ. ރަށުން ބޭރު މީހުންނަށާއި ރާއްޖޭގެ ކުންފުނިތަކަށް ވިއްކަނީ -/75 ރުފިޔާއަށެވެ. އަދި ރާއްޖޭން ބޭރު މީހުންނަށާއި ކުންފުނިތަކަށް ވިއްކަނީ -/100 ޔޫއެސް ޑޮލަރަށް ފޯމެކެވެ.